Atentos a sanidade e educación - José Luís Gómez

José Luís Gómez

Á espera de que o explique en España, o ministro de Economía, Luís de Guindos, avanzou no xornal alemán Frankfurter Allgemeine a reforma dos servizos públicos, sobre todo sanidade e educación, e a mellora do funcionamento dos mercados, por exemplo o de alugueres, así como a liberalización do comercio e os servizos profesionais. Incluídos os dos rexistradores, como Rajoy?, cabería preguntar. En realidade, as súas declaracións responden ás tensións que sofre España no mercado de débeda, que volve desconfiar da economía española por falta de actividade, aínda que o ministro bota balóns fose ao atribuír o acoso á débeda de España ao débil crecemento da UE. A Guindos botoulle unha man o comisario europeo de Asuntos Económicos, Olli Rehn, ao comentar desde a axencia estatal española que o Goberno de Rajoy está facendo fronte aos seus retos económicos con determinación, outra mensaxe dirixida claramente aos mercados, onde se ve con inquietude a recesión, por moito que se axuste o orzamento en 27.300 millóns de euros.

Cando volverá crecer España, que adoita necesitar polo menos un aumento do 2,5% do PIB para crear emprego neto? Guindos sitúa a volta ao crecemento do PIB a medio prazo, sen dar datas, e reitera que 2012 pecharase con máis paro, aínda que segundo el sentarán as bases para un mellor ano 2013. De momento, ao que haberá que estar atentos é ao que pase en sanidade e educación, onde é probable que suceda algo importante, logo de numerosos globos sonda sobre o copago, en sanidade, e a reforma da formación profesional, en educación. A Merkel gustaríalle implantar en España un ensino profesional teórica nun 30% e práctica nun 70%, como en Alemaña, cuxos porcentaxes neste terreo son inversamente proporcionais aos españois. E se por ela fose tamén habería copago en España ou algo similar, como xa sucede en Alemaña desde os tempos do socialdemócrata Gerhard Schröder.

Sobre o recorte no fútbol por agora ninguén di nada, pero todo chegará. Un comentarista de El Periódico de Catalunya, Albert Sáez, xa anda facendo contas ao fío da semifinal Bayern-Madrid. As entradas serán un 40% máis caras de media en Madrid. O orzamento do Madrid é catro veces superior ao do Bayern e a renda per cápita é de 30.000 euros anuais na capital de España e de 53.000 euros na capital de Baviera. Con todo, un madrileño está disposto a pagar un 1% da súa renda para ir á semifinal mentres que un bávaro non gastará máis do 0,2% do que ingresa cada ano.